مآسات رجل في كيه ... ههههههههه

يوميه انفجار بكيه عدنه يصير
ادري شلون ما نصعد بعد كيّه
وصارت بيه دكّه شلون ذاك اليوم
من باب المعظّم جيت عبريه
صِعدَت وحده يمّي مو عجوز اتكول
اظن يمكن عمرها اتكول ست ميّه
كلهه امدكدكه امن الرجل حد الراس
لا هي امن الجنوب ولاهي كرديه
املحكه اعله الرشيد وشايفه القعقاع
ويمكن حاظره بصلح الحديبيه
حطّت جيس يمّي الجيس مدري شبيه
كل ساعه وتمد براسهه شويه
تتلمّظ عليه وتلتفت كل ساع
كلت الموت اجاني وقافله اعليه
كلت اعلاسه ايجوزوصعّدوهه وياي
ودزوهه علَي ذوله الارهابيه
قلق كلّش قلق جبت الدرب تعبان
قلقني الجيس كلّش حط مرض بيه
الحقيقه انا خفت بايك هوه امن الجيس
وأول مره عندي تموت رجليه
يجوز احزام عدهه ومن تفتحه انموت
يجوز امفخخه تطلع الحجيه
يبس حلكي كلت هسّه علينه اتثور
وأول واحد انا يموت بالكيه
امد روحي ردت بس انا امدها شلون
الكيّه هاكبرها تكول قوطيه
زركت انا عليهه وخذت منها الجيس
كلت ميت بعد شو ماكو كل جاره
طلع كلّه تتن ثاري العجوز تريد
تاخذ منّه حفنة لفّت اجكاره